Móra á Barðaströnd er lax-og silungsveiðiá á sunnanverðum Vestfjörðum skammt frá Vatnsfirði og Brjánslæk, þar sem breiðafjarðarferjan Baldur er með landfestar. Um er að ræða tveggja stanga á og eru báðar stangirnar seldar saman. Umhverfi Móru er afar fallegt, vaxið kjarri og lyngi, og því mikið um ber í ágúst. Við eðlilegar aðstæður telst hún fekar vatnslítil og því nauðsynlegt að fara með gát að veiðistöðum. Móra rennur um Mórudal og býr yfir fjölbreyttum veiðistöðum; strengjum og hyljum. Veiðisvæðið er um 6 kílómetrar og er efsta svæðið friðað og að auki er áin hvíld á milli allra holla. Hægt er að komast á fólksbíl að flestum stöðum á neðri hluta hennar, en efri hlutinn er eingöngu fær hærri bílum.

Veiðihús
Veiðihús stendur við Móru og fylgir með veiðileyfum. Áður en komið er að ánni, stendur veiðihúsið þar rétt fyrir neðan þjóðveginn. Veiðihúsið er um 30 fm og er með gistirými fyrir 4 aðila. Veiðimenn þurfa að koma með sængurföt og handklæði.
Skylt er að skrá alla veiði í veiðibók sem liggur frammi í veiðihúsi.
Verönd er við húsið með gasgrilli.
Vöðlugeymsla er fyrir ofan húsið, þar sem að frystir er til staðar.

Leyfilegt agn: Fluga. Fram til 20. ágúst má hver stöng halda eftir einum smálaxi í holli, veiddum löxum umfram það skal sleppt. Eins skal sleppa öllum laxi sem er yfir 70 cm að stærð. Hins vegar er heimilt að landa öllum sjóbirtingi.