Fyrsti laxinn sem veiðist í Ölfusá á þessu sumri kom á land um kl. 10:30 í morgun. Um var að ræða 6 punda fallega hrygnu. Veiðistaðurinn var „stóllinn“. Veiðimaðurinn heitir Sigurður Þ Sigurðarson (Siggi Þór). Töluvert líf var á svæðinu í morgun, fiskar að sýna sig og festa sig laust á agn veiðimanna. Á sama tíma heyrðist af fyrsta laxinum sem kemur á land í Soginu í sumar, sjá mynd hér til hliðar. Veiðimaðurinn tilheyrir félagsskap sem kennir sig við Sogið. Hann heitir Stefán „Togari“ Kristjánsson. Laxinn var 5 punda grálúsugur hængur og tók hann hálf tommu Sun Ray.
Í dag er stærsti straumur sumarsins, Jónsmessustraumurinn. Má segja að flestir veiðimenn bíði spenntir eftir að sjá hverju hann skili, hvort fyrstu alvöru smálaxagöngur sumarsins komi uppí árnar.
