Veiðiskýrsla úr Litluá

Litlaá í Kelduhverfi er bergvatnsá, sem upprunalega átti sér eingöngu upptök í lindum sem heita Brunnar við bæinn Keldunes. Frá 1976 á hún sér einnig upptök í Skjálftavatni en það myndaðist við jarðsig í Kröflueldum.
Vatnið úr Brunnum er óvenju heitt og blandast kaldara vatni úr Skjálftavatni, þannig er meðalhiti vatnsins í ánni um 12°C. Vaxtahraði fiska í Litluá er mikill undir þessum kringumstæðum og er sjóbirtingsstofn árinnar því einn sá stærsti hér á landi.
Árið 2004 kom á land í Litluá stærsti sjóbirtingur sem veiðst hefur hér á landi, 23 punda ferlíki.

Veiðin undanfarin ár hefur verið mjög vaxandi í Litluá og í Skjálftavatni og hefur „veiða og sleppa“ reglan augljóslega skilað sér í fjölgun fiska og fleiri stórum fiskum. Hér að neðan er smá veiðiskýrsla úr Litluá,

Veiðitölur 2013
Nú liggja fyrir veiðitölur fyrir síðastliðið sumar sem var mjög gott í Litluá, eins og árin á undan. Alls veiddust 1778 fiskar í Litluá og 883 í Skjálftavatni. Þetta er lítilsháttar minnkun í Litluá frá síðasta ári en þá veiddust 1895 fiskar. Í Skjálftavatni veiddust 883 fiskar sem er nokkur aukning frá síðasta ári en þá veiddust 670 fiskar. Á vatnasvæðinu veiddust samtals 2661 fiskar en á síðasta ári veiddust 2565 fiskar. Þetta er um 4% aukning á vatnasvæðinu.

Margir veiðimenn settu í mjög væna fiska í sumar eins og undanfarin sumur. Nokkrir urriðar yfir 80 cm veiddust, um 50 fiskar voru yfir 70 cm og mikill fjöldi yfir 60 cm.

Skipting á tegundir er eftirfarandi, tölur frá 2010, 2011 og 2012 eru með til samanburðar. Fækkun er á veiddum urriðum frá síðasta ári en aukning í veiði á bleikju, bæði í Litluá og í Skjálftavatni. Þess ber að geta að gríðarlega mikil aukning var í urriðaveiði á síðasta ári.

[email protected]